ના કદી વાંચી શક્યો હું તારી આંખોની લિપિ, હું અભણ છું ને અભણની એ જ તો તકલીફ છે !

સાંજના વાતાવરણની એ જ તો તકલીફ છે,
બહુ વલોવે છે, સ્મરણની એ જ તો તકલીફ છે !
ઝંખના જીવલેણ છે એ જાણીને પણ ઝંખના,
જીવતા પ્રત્યેક જણની એ જ તો તકલીફ છે !
મૌન પાછળ લાગણી ઢાંકી શક્યું ના કોઈપણ,
સાવ પાંખા આવરણની એ જ તો તકલીફ છે !
ના કદી વાંચી શક્યો હું તારી આંખોની લિપિ,
હું અભણ છું ને અભણની એ જ તો તકલીફ છે !
બારણે જો દે ટકોરા તો હું ભેટીને મળું,
મળતું બિલ્લિપગ, મરણની એ જ તો તકલીફ છે.